hum agar sach ke unhen qisse sunane lag jaen
log to phir hamein mahfil se uthane lag jaen

yaad bhi aaj nahin thik tarah se jo shakhs
hum use bhulna chahen to zamane lag jaen

sham hote hi koi khushbu daricha khole
aur phir bite hue lamhe satane lag jaen

khud charaghon ko andheron ki zarurat hai bahut
raushni ho to unhen log bujhane lag jaen

ek yahi soch bichhadne nahin deti tujh se
hum tujhe baad mein phir yaad na aane lag jaen

ek muddat se ye tanhai mein jage hue log
khwab dekhen to naya shahr basane lag jaen