hum ek hain hum ek hain hum ek rahenge
hum de ke khushi auron ko dukh un ka sahenge

hum phul hain khushbu hi sada denge jahan ko
hargiz na kabhi kanta kahin ban ke chubhenge

hum narm-kalami ke mohabbat ke hain khugar
akhlaq har ek haal mein behtar hi rahenge

muskan hamein deni hai dushman ke labon par
aankhon se kisi ki na yahan ashk bahenge

han aql-o-khirad se jinhen nisbat nahin hogi
khud-karda gunahon se balaon mein phasenge

wo tum ko mile dair-o-haram mein nahin mumkin
'hassan' use dhund dilon mein ye kahenge