hum hain bas itne hi sahil-ashna
khak-e-manzil jitni manzil-ashna

tujh se chhutte hi ye aalam hai ki ab
dil ki dhadkan bhi nahin dil-ashna

shama be-parwana jalwa be-nagar
kya hue aakhir wo mahfil-ashna

aah ye tufan-ba-kaf abr-o-hawa
aah wo yaran-e-sahil-ashna

waqt wo sahra ki jis ki gard mein
gum hue jate hain manzil-ashna

is ki qurbat par na itrao 'amir'
mauj kab hoti hai sahil-ashna