hum hatheli pe jaan rakhte hain
aur teri aman rakhte hain

chand ashkon ke waste sahab
teri baaton ka man rakhte hain

tum guzarte ho ajnabi ban kar
hum to dil par chatan rakhte hain

jo bhi hain hum bas ek hamin hain hum
dost kya kya guman rakhte hain

mithi baaton se kya unhen matlab
har ghadi sina tan rakhte hain

kitne shatir hain wo mere ham-dam
dil mein tir-o-kaman rakhte hain

khamushi maslahat rahi 'mahtab'
warna hum bhi zaban rakhte hain