hum junun ko zindagi ka mustaqar samjha kiye
ai 'shifa' manzil kidhar thi aur kidhar samjha kiye

wae ye kotahi-e-ehsas-o-tangi-e-nazar
zindagi ko zindagi bhar mukhtasar samjha kiye

karwan pahunche qarib-e-sai-e-anjam-e-safar
aur hum mafhum-e-aghaz-e-safar samjha kiye

be-khudi ne kis qadar gumrah rakkha ishq ko
hum tasawwur hi ko husn-e-mo'atabar samjha kiye

dekh kar bhi un ko hum mayus-e-nazzara rahe
har nazar ko laghzish-e-zauq-e-nazar samjha kiye

husn ke rangin muamme ishq ke ghamgin raaz
kuchh samajh mein to na aate the magar samjha kiye

zarre zarre ka shuur o zehn ko irfan tha
be-khabar the khud jo hum ko be-khabar samjha kiye

aaj tak hum ne farogh-e-dil pe nazren hi na kin
mehr-o-mah par munhasir apni sahar samjha kiye

dar-haqiqat wo halakat-afrin nikli 'shifa'
hum jise ab tak mohabbat ki nazar samjha kiye