hum khak-nashinon ko rahat ka ujala de
kab hum ne kaha tujh se sone ka niwala de

rahne ko haweli hai shohrat bhi mili lekin
kirdar bhi kuchh tujh ko allah-taala de

ab aisi mohabbat se dil kaun lagata hai
jo zakhm jigar mein de aur panw mein chhaala de

kya uth gai duniya se har rasm-e-wafa ya rab
kahta hai ye diwana ek chahne wala de

ai yar meri chahat aur zarf ko kya jaane
pi lun tere hathon se gar zahr ka pyala de

apna ho ki dushman ho ye 'taj' na dekha kar
har shakhs ko khush ho kar akhlaq nirala de