hum ko azim kah ke jo dhoka diya gaya
raste mein ek pahad sa la kar rakha gaya

socha tha wo mile to karenge shikayaten
wo jab mila to milte hi sara gila gaya

ek ek kadi ko jod ke dekha to ye khula
mera zamin ki had se pare silsila gaya

pahla sa rabt-zabt na mujh se raha use
phir rafta-rafta main bhi use bhulta gaya

ab aa ke hum ne sher ghazal ke kahe 'nadim'
tha jazb-o-fikr mein jo kabhi fasla gaya