hum ko khuda ne dil diya dil mein diya gudaz-e-ishq
bakhsha khuda ne aap ko husn-e-karishma-saz-e-ishq

roab-e-jamal-e-yar se kham hai sar-e-niyaz-e-ishq
husn ki bargah mein padhte hain hum namaz-e-ishq

koi batae to hamein kis ko nahin hai aaz-e-ishq
kaun hai is jahan mein be-gham-o-be-niyaz-e-ishq

khak mein mil ke ishq mein milti hain sar-bulandiyan
ho ke zalil-o-khwar ishq hota hai sarfaraaz ishq

yara raha na zabt ka tab rahi na sabr ki
aah-o-fughan ne kar diya fash hamara raaz-e-ishq

zahid-e-na-shanas ka ishq se wasta hai kya
kijiye aashiqon se hal masala-e-jawaz-e-ishq

sanat-e-kirdgar par karta hun jaan-o-dil nisar
rakhta hun sari umr se husn se saz-o-baz-e-ishq

khata hai pahle dil ko ye panja-e-gham se noch kar
karta hai aadmi pe war jis ghadi shah-baz-e-ishq

hum wo rahe na dil raha dil mein na walwale rahe
bazm-e-shabab uth gai band hai soz-o-saz-e-ishq

husn mein un ke aur bhi tak gae hote chaar-chand
kash ki hote wo kabhi dilbar-o-dil-nawaz-e-ishq