hum na duniya ke hain na din ke hain
hum to ek zulf-e-ambarin ke hain

shisha-o-mai se be-niyaz hain hum
mast us chashm-e-surmagin ke hain

rang ho raushni ho ya khushbu
sab mein partaw usi hasin ke hain

chashm-e-be-khwab daman-e-gulgun
sab karishme usi zahin ke hain

hain makin qarya-e-mohabbat ke
aasman ke na hum zamin ke hain

aae the shahr-e-husn mein ek din
aur ek umr se yahin ke hain

aayaten hain hamari qismat ki
ye jo chitwan teri jabin ke hain

zulmat-e-sham-e-hijr se 'imrran'
tazkire ek mah-jabin ke hain