hum pe wo mehrban ziyaada hai
is yaqin mein guman ziyaada hai

kuchh kami hai to karwan mein yahi
rahbar-e-karwan ziyaada hai

hai to waiz khuda-parast magar
lab pe zikr-e-butan ziyaada hai

peshtar bhi yahi qafas tha magar
ab ke shor-e-fughan ziyaada hai

zulm ki khair ho ki azm-e-jawan
aur bhi ab jawan ziyaada hai

allah allah bazm-e-nau ke charagh
raushni kam dhuan ziyaada hai

kam na jaano kisi ko tum 'khawar'
jo jahan hai wahan ziyaada hai