hum to duniya se bad-guman thahre
aage dil ki khushi jahan thahre

hae wo qafile jo lut kar bhi
zer-e-diwar-e-gulsitan thahre

aap ko karwan se kya matlab
aap to mir-e-karwan thahre

zindagi chahti hai hangama
aur hum log be-zaban thahre

kabhi teri talash mein nikle
kabhi ban kar tera nishan thahre

gardish-e-dahr sath sath rahi
hum jidhar bhi gae jahan thahre

har qadam par tha ek sanam-khana
kya bataen kahan kahan thahre

kuchh to kaj-rau jahan bhi hai 'baqi'
aur kuchh hum bhi qissa-khwan thahre