hum to us kuche mein ghabra ke chale aate hain
do qadam jate hain phir ja ke chale aate hain

hum ko ai sharm tuk ab us ki taraf jaane de
haal apna use dikhla ke chale aate hain

din ko zinhaar thaharte nahin hum us ku main
raat ko milne ki thahra ke chale aate hain

wo ada-kushta thaharta nahin phir maqtal mein
lash ko jis ki wo thukra ke chale aate hain

main bharose hi mein rahta hun teri zulfon mein
yar mere mujhe phanswa ke chale aate hain

wo jo milta nahin hum us ki gali mein dil ko
dar-o-diwar se bahla ke chale aate hain

jate hain kuche mein hum us ke to wan ghair ko dekh
phir na aane ki qasam kha ke chale aate hain

qaidi mar jate hain jab aap kabhi zindan ke
qufl darwaze ko lagwa ke chale aate hain

chhutte hain jo asiran-e-qafas gulshan mein
kya hi par shauq se phaila ke chale aate hain

ghair jab wasl ka karta hai sawal un se to we
kaise mahjub ho dam kha ke chale aate hain

rah-rawan-e-safar-e-baadiya-e-ishq ai wae
qafile rah mein lutwa ke chale aate hain

main to samjha tha bujhawenge kuchh aansu tuf-e-dil
ye to aur aag ko bhadka ke chale aate hain

sath mayyat ke meri wo nahin chalte do qadam
bas wahin nash ko uthwa ke chale aate hain

dil ki betabi se jate to hain hum us ku mein
lek is jaane se pachhta ke chale aate hain

badraqa gar nahin ahbab to phir kyun pas-e-marg
ta-ba-manzil mujhe pahuncha ke chale aate hain

'mushafi' ke tain dekhen hain jo wo kushta pada
pas jate nahin sharma ke chale aate hain