hum zikr-e-nau-bahaar karen ya nahin karen
ek jabr ikhtiyar karen ya nahin karen

khun-e-jigar charagh-e-wafa khana-e-umid
ab un ka intizar karen ya nahin karen

zanjir ko sanbhaal ke baithe hain der se
diwangi ko pyar karen ya nahin karen

kya jaane lut le koi aakar mata-e-gham
haalat sazgar karen ya nahin karen

aaya hai phir salam-e-mohabbat adab ke sath
hum un pe eatibar karen ya nahin karen

'sabir' kisi ki bazm se kuchh wasta nahin
zikr-e-wafa-shiar karen ya nahin karin