karobar-e-zindagi se jis ka dil ghabraega
yar ki zulf-e-rasa ke sae mein aa jaega

tazkira rukhsar ka ya zikr-e-zulf-e-yar ho
kaif aankhon mein yaqinan kuchh na kuchh chha jaega

jo manazir aaj tak tum ne kabhi dekhe nahin
koi tum ko wo manazir ek din dikhlaega

ab karam-farmaiyan hon ya itab-e-naz ho
aap ke dast-e-karam se dil sila kuchh paega

waqt ki uljhi hui zulfen sanwaren kis tarah
ahl-e-dil ko ye saliqa khud-bakhud aa jaega

aap pahle hans ke gham khate rahe 'sabir' magar
ab yahi gham rafta rafta aap ko kha jaega