hum ne dekhi wafa sahaaron ki
ban gae dhul rahguzaron ki

zakhm bharne yahan nahin pate
ye to basti hai dil-figaron ki

gham-kadon ke charagh maddham hain
khushk aankhen hain gham ke maron ki

ab to dasne lage hain raaz hamein
ye inayat hai raaz-daron ki

daman-e-gul mila hai sad-para
yun haqiqat khuli hai kharon ki

aashna-e-sitam hue jab se
justuju hai sitam-shiaron ki

naw ka dubna lab-e-dariya
tang-zarfi hai ye kinaron ki

'bakht' jashn-e-shikasta-pai hai
dhul raqsan hai rahguzaron ki