hum ne har gham dil-e-sad-chaak se bahar rakkha
aag ko pairahan-e-khak se bahar rakkha

zeb-e-tan hum ne bhi kar rakkhi ye duniya lekin
tere har rang ko poshak se bahar rakkha

khwab-dar-khwab tujhe dhundne walon ne bhi ab
nind ko dida-e-namnak se bahar rakkha

ek tarah dhyan hi aisa ki jise hum ne yahan
nafa nuqsan ke pechaak se bahar rakkha

ujrat-e-ishq bahut kam thi sau hum ne 'shahzad'
dil ko is tangi-e-aflak se bahar rakkha