hum ne jaez sharab kar dali
zindagani kharab kar dali

dhajji dhajji khud apne mazhab ki
hum ne aali janab kar dali

sirf duniya hi tak nahin mahdud
aaqibat tak kharab kar dali

koi chehra nazar nahin aata
koshish-e-be-hisab kar dali

aql-mandon ne zid mein qudrat se
kul zamin zer-e-ab kar dali

kuchh samajh mein na aap ke aaya
khatm sari kitab kar dali

kya qayamat hai pir-o-murshid ne
kufr masti sawab kar dali

bas ke 'asi' ye waqt-e-tauba hai
aarzu be-hisab kar dali