hum ne pai lazzat-e-didar lekin dur se
un ki surat dekh li sau bar lekin dur se

wo dikhate hain hamein rukhsar lekin dur se
is ka matlab hai ki kar lo pyar lekin dur se

us ne jaancha mera dard-e-dil magar aaya na pas
us ne dekha mera haal-e-zar lekin dur se

rauzan-e-diwar se hasrat bhari aankhen ladin
ho gain un se nigahen chaar lekin dur se

us ne aane ka kiya hai qaul lekin ta-ba-dar
us ne milne ka kiya iqrar lekin dur se

pas 'muztar' kis tarah jate hujum-e-yas mein
ho gaya un ka hamein didar lekin dur se