hum se thin raunaqen bazm-araiyan
ab sajate raho apni tanhaiyan

koi khushbu nahin koi naghma nahin
roz chalne ko chalti hain purwaiyan

meri jaan main tujhe kis tarah jaanta
is qadar wusaten itni gahraiyan

dekh lije kahin aap hi to nahin
meri aankhon mein hain chand parchhaiyan

kaisa afsos matam ho kis baat ka
phir wahi pastiyan aur paspaiyan

haisiyat kya hai tahzib-o-aqdar ki
kore kaghaz pe hain khama-farsaiyan