hunar se jae kisi ke na fan se jata hai
lahu ka dagh kahin pairahan se jata hai

ba-sad ada nigah-e-sim-tan se jata hai
jigar ke par har ek tir san se jata hai

numud-e-tegh-e-badan marke ka jauhar hai
dikha ke pith kahin koi ran se jata hai

ragon mein soz-e-gham-e-ishq se lahu hai rawan
so wahshi aage nikal kar hiran se jata hai

mizha pe hota hai raushan charagh-e-tanhai
asir-e-zulf agar anjuman se jata hai

na koi tesha na sang-e-giran na ju-e-shir
junun-e-ishq dil-e-kohkan se jata hai