husn aks-e-jamal-e-fitrat hai
ishq sar-chashma-e-mohabbat hai

khul gaya ghuncha-e-shabab kahin
nikhaton mein nahai khalwat hai

muddaa hai larazte honton par
imtihan-e-waqar-e-ghurbat hai

apne ghar mein bhi hum nahin mahfuz
koi tohmat nahin haqiqat hai

dekh kar hum ko barsar-e-paikar
gardish-e-waqt mahw-e-hairat hai

meri ghazlon pe kijiye tanqid
mujh ko is ki bahut zarurat hai

hum hain urdu zaban ke khud qatil
ai 'tarab' kyon kisi pe tohmat hai