husn hai dad-talab shikwa-e-bedad na kar
ishq ki fath isi mein hai ki fariyaad na kar

hai agar himmat-e-parwaz to ai murgh-e-asir
taer-e-ruh ko minnat-kash-e-sayyaad na kar

tishna-e-lazzat-e-gham hai dil-e-pur-dard hunuz
tu abhi tark-e-sitam ai sitam-ijad na kar

ham-nashin apne muqaddar ki shikayat karke
meri ranai-e-afkar ko barbaad na kar

tujh ko sayyaad mere zauq-e-asiri ki qasam
chhod de ham-qafason ko mujhe aazad na kar

wo na aae hain na aaenge palat kar 'maikash'
aise guzre hue lamhat ko ab yaad na kar