sab zar-parast the sar-e-bazar bik gae
wo qimaten badhin ki kharidar bik gae

ek dusre ki hirs ne andha bana diya
zebaish-e-makan mein ghar-bar bik gae

bhadki ba-faiz-e-muflisi jab aatish-e-shikam
do rotiyon mein logon ke pindar bik gae

achchhon ko is jahan mein koi puchhta nahin
sab parsa khade hain gunahgar bik gae

hum muflison ke pas to bikne ka hai jawaz
'arif' batao kis liye zardar bik gae