husn jab be-naqab hota hai
ishq khana-kharab hota hai

kitne masum dil jala dale
ek qayamat shabab hota hai

ghair se bandhte ho ahd-e-wafa
hum se lekin hijab hota hai

main ne mana ki khwab hai ulfat
kitna shirin ye khwab hota hai

kis ki nazron se pi raha hun main
kaun mast-e-sharab hota hai

jab lab-e-baam aap aate hain
jalwa-gar mahtab hota hai

aaina us ke ru-ba-ru ho to wo
aap apna jawab hota hai