husn ki bijliyan al-aman al-aman
ishq ki garmiyan jawedan jawedan

bagh mein gar nasheman jala kya hua
gham hai sahra hue gulistan gulistan

kuchh na mahmil-nashin ka pata mil saka
hum phire dhundte karwan karwan

bagh-e-alam mein gar koi bijli giri
raushni ho gai aashiyan aashiyan

hai yaqinan koi baat aisi ki tum
ho tabassum ba-lab shadman shadman

ek din ghuncha-dil bhi khil jaega
aaegi fasl-e-gul gulsitan gulsitan

kya asar kuchh girani ka tum par nahin
shams' phirte ho kyun shadman shadman