husn ki chaaragari ne ek karishma kar diya
hath se chhu kar faqat bimar achchha kar diya

dal-roti kha ke muflis kat lete the magar
ab siyasat ne use bhi khwab jaisa kar diya

ek misre par ruka tha silsila jo der se
us ne dekha muskura kar sher pura kar diya

shahr mein chehre the yun kahne ko to sab mukhtalif
ishq ne har ek chehra aap jaisa kar diya

ek ana jo dil ke andar chhup ke baithi thi mere
us ne meri har dua ko be-natija kar diya