husn se aankh ladi ho jaise
zindagi chaunk padi ho jaise

hae ye lamha teri yaad ke sath
koi rahmat ki ghadi ho jaise

rah roke hue ek muddat se
koi doshiza khadi ho jaise

uf ye tabani-e-mah-o-anjum
raat sehre ki ladi ho jaise

un ko dekha to hua ye mahsus
jaan mein jaan padi ho jaise

mujh se khulte hue sharmate hain
ek girah dil mein padi ho jaise

uf ye andaz-e-shikast-e-arman
shakh-e-gul tut padi ho jaise

uf ye ashkon ka tasalsul 'unwan'
koi sawan ki jhadi ho jaise