huzur-e-yar bhi aansu nikal hi aate hain
kuchh ikhtilaf ke pahlu nikal hi aate hain

mizaj ek nazar ek dil bhi ek sahi
muamalat-e-man-o-tu nikal hi aate hain

hazar ham-sukhni ho hazar ham-nazari
maqam-e-jumbish-e-abru nikal hi aate hain

hina-e-nakhun-e-pa ho ki halqa-e-sar-e-zulf
chhupao bhi to ye jadu nikal hi aate hain

janab-e-shaikh wazu ke liye sahi lekin
kisi bahane lab-e-ju nikal hi aate hain

mata-e-ishq wo aansu jo dil mein dub gae
zamin ka rizq jo aansu nikal hi aate hain