iltifat-ashna hijab tera
lutf-e-pinhan hai ijtinab tera

kya mila hai maal-e-bedari
meri aankhen hain aur khwab tera

dil se karta hun lakh lakh sawal
yaad aata hai jab jawab tera

koi dekhe tujhe to kya dekhe
ki tera husn hai naqab tera

hae un laghzishon ki ranai
dhundhta hai jinhen itab tera

ishrat-e-dil thi dil ki barbaadi
tut kar ban gaya rabab tera

kis se puchhen ki ab kahan hai 'rawish'
hae wo khanuman-kharab tera