iltifat-e-ishq se jab husn kaamil ho gaya
har tamanna ka mujhe ehsas mushkil ho gaya

hote hote bais-e-barbaadi-e-dil ho gaya
parde hi parde mein us ka husn kaamil ho gaya

yun naqab-e-rukh ulat di us ne bazm-e-naz mein
koi diwana hua aur koi ghafil ho gaya

us ki hasti us ki masti us ka lutf-e-iztirab
jis ke dil mein tera dard-e-shauq shamil ho gaya

ab ba-juz tufan-e-gham kuchh bhi nazar aata nahin
kya meri nazron mein pinhan mera sahil ho gaya

uf wo duzdida nigahen aah un ka iltifat
ek nazuk tir tha main jis se ghail ho gaya

'dard' rahat mil rahi hai iztirab-e-shauq mein
kya meri betabiyon mein wo bhi shamil ho gaya