ilzam be-sabab na kisi par dhara karen
tahqiq apne taur pe bhi kar liya karen

khud hi ghubar-e-rah dikhaenge rasta
paida to aap dil mein zara hausla karen

rukhsar-o-lab ki baat bahut ho chuki hai ab
haalat-e-hazira pe koi tabsira karen

ye baat doston ko bhi guzregi nagawar
izhaar-e-dushmani na kabhi barmala karen

tal jati hain musibaten is kar-e-khair se
mohtajon be-nawaon ko sadqa diya karen

nafrat ki tirgi ko mitane ke waste
har chaar samt pyar ka raushan diya karen

dil mein na ho khulus to be-sud hai miyan
din-raat aap lakh ibaadat kiya karen

'shadan' qadam qadam pe ye deti rahi fareb
hum zindagi ke sath kahan tak wafa karen