in hasinon ki mohabbat ka bharosa kya hai
koi mar jae bala se inhen parwa kya hai

yaad aata hai shab-e-wasl kisi ka kahna
khair hai khair se is waqt irada kya hai

wo ayaadat ko meri aaenge aise hi to hain
nama-bar waqai sach kahta hai bakta kya hai

dushman-e-mehr daghabaz sitamgar qatil
jaante bhi ho zamana tumhein kahta kya hai

uth gae hazrat-e-'mahmud' zamane se 'rashid'
na ho ustad to phir lutf ghazal ka kya hai