in shokh hasinon ki nirali hai ada bhi
but ho ke samajhte hain ki jaise hain khuda bhi

ghabra ke uthi hai meri baalin se qaza bhi
jaan-bakhsh hai kitni tere daman ki hawa bhi

yun dekh rahe hain meri jaanib wo sar-e-bazm
jaise ki kisi baat pe khush bhi hain khafa bhi

mayus-e-mohabbat hai to kar aur mohabbat
kahte hain jise ishq maraz bhi hai dawa bhi

tujh par hi 'sahar' hai ki tu kis haal mein kate
jina to haqiqat mein saza bhi hai jaza bhi