inayat hai teri bas ek ehsan aur itna kar
mere is dard ki miad mein bhi kuchh izafa kar

guman se bhi ziyaada chahiye sarsabz kisht-e-jaan
faqat pichhle pahar kya har pahar ai aankh barsa kar

to phir ikram kya shai hai jo tanhai mein tanha hun
koi mahfil ata kar qaede ki us mein tanha kar

nafas ki aamad-o-shud ruk na jae peshtar is se
zamin ko aur nicha aasman ko aur uncha kar

bahut mumkin hai meri baaten be-mani lagen tujh ko
inhen majzub ki bad jaan aur chup-chap socha kar