iram ke nur se tera makan jalae gae
charagh hum the kahan ke kahan jalae gae

hamin ko us ne payambar kiya mashiat ka
hamin se raaz-e-mashiat magar chhupae gae

kabhi to hum pe khulenge khushi ke darwaze
isi umid pe hum tere gham uthae gae

jo kal talak rahe aasi khitab-e-mahfil mein
wo log aaj tere nam se bulae gae

ugal rahe the jo lawa gham-e-tassub ka
hamare khun se wo aatish-fishan bujhae gae

rah-e-hayat mein bhadki hai jab nifaq ki aag
magar is aag ka luqma hamin banae gae

rafu kiya kiye chaak-e-wafa-o-tar-e-qaba
wo ruthte rahe aur hum unhen manae gae