is daur-e-gham mein shokh tabiat kahan se laen
har waqt muskurane ki aadat kahan se laen

rahat ho jis mein aisi aziyyat kahan se laen
dozakh mein rah ke ishrat-e-jannat kahan se laen

un ke baghair gham ki masarrat kahan se laen
ek nur mein dhali hui zulmat kahan se laen

un ki mohabbat un ki inayat kahan se laen
ai zindagi tere liye jannat kahan se laen

wo aaenge zarur hamein bhi yaqin hai
lekin ab intizar ki taqat kahan se laen