is girya-e-paiham ki aziyyat se bacha de
aawaz-e-jaras ab ke baras mujh ko hansa de

ya abr-e-karam ban ke baras khushk zamin par
ya pyas ke sahra mein mujhe jina sikha de

main bhi teri khushbu hun meri samt bhi tu dekh
mohlat tujhe gar silsila-e-mauj-e-saba de

suraj ne mujhe barf kiya hai to tujhe kya
kiya tujh ko agar barf mujhe aag laga de

aisa bhi nahin hai ki faqat khak-nashin hun
aa jae hawa aa ke meri khak uda de

khushbu ki tarah dar-badri khu ho meri gar
hai shak to mujhe meri nigahon mein gira de

kante ki jarahat se bhi mar jate hain kuchh log
rakh hausla itni bhi na ab khud ko saza de

ya rab teri rahmat ka talabgar hai ye bhi
thodi si mere shahr ko bhi aab-o-hawa de

kya tera bigadta hai agar chandni shab tu
ek bar mujhe phir meri aawaz suna de