is ka to gham nahin dil-e-diwana jal gaya
zalim ye gham hai tera sanam-khana jal gaya

bedad rashk se dil-e-diwana jal gaya
sad-haif hum na jal gae parwana jal gaya

shayad safa-e-husn mein muzmar thin ranjishen
aaghosh-e-iltifat mein parwana jal gaya

saqi ki chashm-e-naz se nisbat hai kya use
bas ek nigah-e-garm mein paimana jal gaya

hangama-e-hayat hua khatm us ke sath
ab koi kya jiye dil-e-diwana jal gaya

aatish sarisht-e-shama hai ya hai itab-e-husn
hum itna jaante hain ki parwana jal gaya

tere karam se dil pe jo guzri wo kya kahen
sahba-e-atishin se ye paimana jal gaya