is khizan ki rut mein apna sath achchha rah gaya
sab parae ho gae ek main hi apna rah gaya

zindagi hamwar thi to sath tha amboh ek
zindagi ke mod par pahuncha to tanha rah gaya

kal saja tha jin ke chehron par mohabbat ka naqab
kitni hairat se unhen main aaj takta rah gaya

ek saya tha chala subh-e-azal mujh se tawil
aafaton ka aaftab aaya to chhota rah gaya

wo zamana tha kabhi ki tha hujum ek subh o sham
yaad tha sab kuchh hamein bas yaad itna rah gaya

jo kisi ke jism ka kal tak raha tha ek libas
ab alaihida yun hua ki koi nanga rah gaya

har hasin chehre pe jam kar rah gai mausam ki gard
har hasin chehra mere albam ka dhundla rah gaya

main bhala kaise karun pabandi-e-ahl-e-fareb
maslahat mein dub kar kaise wo sachcha rah gaya

jab hui hai gham ki yurish har taraf se be-hisab
main ne khushiyan bant din aur khud nihatta rah gaya

har koi tark-e-talluq par musir hai ab 'khayal'
aa mere dil tu bhi aa ja kis ka dhadka rah gaya