is mohabbat mein kuchh maza bhi nahin
jis mein ranjish nahin bala bhi nahin

chal diye kya jahan se ahl-e-wafa
aaj un ka kahin pata bhi nahin

aisa insan bhi ghanimat hai
jo bhala bhi nahin bura bhi nahin

mujh se mil kar wo chal diye chup-chap
kuchh kaha bhi nahin suna bhi nahin

ai gulo muskurae jate ho
tum ko khauf-e-khizan zara bhi nahin

jis ne duniya mein daud-dhup na ki
us ko duniya se kuchh mila bhi nahin

apni apni lagi hai sab ko yahan
ek ko ek puchhta bhi nahin