is qadar paemal hain hum log
aap apni misal hain hum log

be-niyaz-e-malal hain hum log
lakh said-e-zawal hain hum log

apne isyan ki sharmsari se
paikar-e-infial hain hum log

ek fasana hai shaukat-e-mazi
dekh lo khasta-haal hain hum log

but-kade mein azan na den to sahi
yaadgari bilal hain hum log

kyun pareshan hai ai dil-e-mahzun
daulat-e-la-zawal hain hum log

hum se raushan hai aasman-e-adab
ghairat-e-sad-hilal hain hum log

ek muamma hai zindagi 'shatir'
kya anokha sawal hain hum log