mere dil pe tera qabza mera ikhtiyar tu hai
meri zindagi ka hasil mera intizar tu hai

tera kis se wasta hai tujhe kis ki hai tamanna
jo halak-e-jalwa-e-gham dil-e-be-qarar tu hai

meri mushkilon mein aksar mere kaam aane wale
mera munis-o-nigahban mera gham-gusar tu hai

tujhe meri justuju hai mujhe aarzu hai teri
tera e'tibar main hun mera e'tibar tu hai

koi dur dur tujh se koi pas pas tere
kahin tu kare hai parda kahin aashkar tu hai

kahin rukh chamak rahe hain kahin dil mahak uthe hain
kahin zau-fishaniyan hain kahin mushk-bar tu hai

tere dar pe aa gaya hai ye siyahkar 'shatir'
meri bakhsh de khataen ki ata-shiar tu hai