ishq ke imtihan se guzre hain
jaan kar hum bhi jaan se guzre hain

hum bataenge hijr ki lazzat
hum bhi is imtihan se guzre hain

sar-e-manzil ghubar sa kya hai
karwan kya yahan se guzre hain

aaj baad-e-saba mein shokhi hai
ho na ho wo yahan se guzre hain

aao tum ko bataen haal apna
jaan-nisari mein jaan se guzre hain

hae kya log the jo ab ke baras
na-gahan is jahan se guzre hain

kya qayamat hai aaj wo bhi 'azim'
bad-guman bad-guman se guzre hain