ishq ko kaamyab hona tha
aap ko be-naqab hona tha

kya shikayat tere taghaful ki
khatm mera shabab hona tha

aap ne hosh kho diye mere
aaj hi be-naqab hona tha

kyun na dil chhin kar wo le jate
zindagi ko kharab hona tha

un hasinon ke zulm sahne ko
mera hi intikhab hona tha

kyun zulekha ka khwab ban na gaya
gar mujhe kaamyab hona tha

chir kar dil ko dil se nikli thi
aah ko kaamyab hona tha

mil ke 'shankar' se aaj us ne kaha
tujh ko mast-e-sharab hona tha