ishq mein dil ban ke diwana chala
aashna se ho ke begana chala

qulqul-e-mina se aati hai sada
bhar chuka jis waqt paimana chala

be-zabanon ko bhi aai hai zaban
bedi ghul karti hai diwana chala

ishq-bazi bazi-e-shatranj hai
chaal nadan rah gaya dana chala

shab jo aaya bazm mein wo shola-ru
shama gul karne ko parwana chala

bu-e-gul ghuncha se kahti hai 'nasim'
baat nikli munh se afsana chala