islam aur kufr hamara hi nam hai
kaba kunisht donon mein apna maqam hai

ye ishq jis ka shor hai aalam mein hain hamin
ye husn hum hain jis ki ye sab dhum dham hai

ban kar sukhan zaban pe aalam ki hain hamin
masruf apne zikr mein bas har ek dam hai

dekho jis aankh mein to hamara hi nur hai
har kan mein bhara ye hamara kalam hai

jo kushtagan-e-marka-e-tegh-e-ishq hain
un ke liye ye aalam-e-hasti dawam hai

ku-e-sanam se hum ko sarokar hai faqat
waiz teri bahisht ko apna salam hai

'asim' na chhodo daman-e-khadim-safi kabhun
mamur jis ki faiz se har khas-o-am hai