itna hi nahin hai ki tere bin na raha jae
wo jaan pe bani hai ki jiye bin na raha jae

ab dastaras-e-shauq hai bas nam tak us ke
akasr jise sau tarah likhe bin na raha jae

gham-burda sahi ghuncha-e-afsurda sahi dil
tum pyar se dekho to khile bin na raha jae

hai dil hi wo nadan ki ho tadbir se naumid
aur phir koi tadbir kiye bin na raha jae

uftad mein kuchh sai-e-matanat nahin chalti
rone ko jo roken to hanse bin na raha jae

hum wo hain ki sad-kaba o sad-dair ke hote
gosha koi tamir kiye bin na raha jae

kuchh der guzarti hai ki ai bulbul-e-nashad
sayyaad se nakhchir hue bin na raha jae

har chand ki furqat mein teri zahr ho jina
kuchh qahr hai aisa ki jiye bin na raha jae