itni gustakhi to ai sayyaad kar leta hun main
qaid-e-gham se ruh ko aazad kar leta hun main

baithe baithe tujh ko jis dam yaad kar leta hun main
maya-e-sabr-o-sukun barbaad kar leta hun main

wae-nadani ki paida kar ke tujh se bad-zani
aap apne dil ko khud nashad kar leta hun main

ho ke majbur-e-tamasha wahm ki taswir se
lazzat-e-zauq-e-nazar barbaad kar leta hun main

kar ke mustaqbil ki kuchh ranginiyon pe e'timad
gham-zada dil ko bhi apne shad kar leta hun main

kuchh tasawwur se tere kuchh dil se ho kar ham-kalam
apna yun furqat-kada aabaad kar leta hun main