itni hawa na waiz-e-din-dar bandhiye
izzat sanbaaliye sar-e-dastar bandhiye

gum kijiye hawas ko tafsir-e-hosh mein
danish ko jahl jahl ko pindar bandhiye

mahrum-e-hosh soiye par dije dad-e-hosh
gul ko giyah dasht ko gulzar bandhiye

bu chhiniye gulon se ki dete hain zauq-e-fan
yun khush-nawa tuyur ki chahkar bandhiye

ab juz hawa nahin hai girah mein hamari khak
sau bar kholiye use sau bar bandhiye

bhadki hai aag 'arsh' khayaban-e-bazm mein
hadd-e-jalal-e-shoala-e-guftar bandhiye