jaan jati nahin aur jaan se guzar jate hain
hum judai ke bhi ehsas se mar jate hain

bandh kar rakht-e-safar soch rahi hun kab se
jin ka ghar koi nahin hota kidhar jate hain

jin ko tariki mein raaton ki munawwar dekha
subh hoti hai to phir jaane kidhar jate hain

jab bhi khuddari ki diwar ko dhana chahen
apne andar ki sada sun ke thahar jate hain

raste us ne yun taqsim kiye the 'amabar'
ab udhar jaana hai tum ko hum idhar jate hain